Повеќе од 200 жени од различни делови на Македонија се прегледани во рамките на проектот „Мобилни гинеколошки амбуланти“ што го реализизираа Македонското лекарско друштво, Македонската асоцијација на гинеколози и опстетичари, Универзитетската клиника за гинекологија и акушерство и Црвен крст на Македонија со поддршката од dm дрогерија маркет.
Проектот опфатил 16 теренски посети во рурални и маргинализирани заедници, преку кои биле собрани и важни податоци за бариерите, потребите и предизвиците поврзани со гинеколошкото здравје.
ПАП тестот е најефикасен кога се изведува редовно, на секои една до три години според возраста и ризикот. Скринингот пак овозможува навремено откривање и спречување на цервикален карцином, а многу жени, особено од маргинализирани заедници, сè уште немаат пристап до овие услуги, се дел од заклучоците од проектот.
На панел-дискусијата во „Јавна соба“ беа отворени исклучително важни теми поврзани со женското и менструалното здравје. Панелисти беа координаторот на програмата за малигни заболувања во Министерството за здравство, проф. д-р Елена Ристоска, шефицата на канцеларијата на УНФПА д-р Афродита Шалја, претседателот на Македонското лекарство друштво, проф. д-р Горан Димитров и други. Тие зборуваа за пристапот до соодветна грижа за жените од тешко достапите места, за поттикнувањето на редовни гинеколошки прегледи за жени од сите возрасти, превенција на цервикалниот карцином – проблем со кој се соочуваат многу жени во светот. Се споделија и препораки како проектот да продолжи да живее и да им служи за подобрување на здравјето на жените.
